منقبت مولا علی رضی اللہُ تعالیٰ عنہ

منقبتِ حیدر کرار
 رضی اللہ عنہ


خدا کے شیر ، اے مولائے کائنات علی
شرَف کا گوہرِ یکتا، تری حیات علی


مُحیطِ کون ومکاں تیرا جلوۂ اِدراک
تری چمک سے بھرا ظَرفِ شَشْ جِہات علی


پڑے ہیں فکر و نظر کے کلیم حیرت میں
ہیں طُور علم پہ تیری تجلّیات علی


تو لا جواب ہے جس رخ سے بھی تجھے دیکھا
کہ اک خزینہ عظمت ہے تیری ذات علی


نگاہِ کون و مکاں میں نہیں بَدَل تیرا
ہے بـے مثال ترا جوہر صفات علی


خدا کے فضل سے تجھ کو ملی ہے وہ قدرت
زمانہ ہے ترےزیرِ تصرُّفات علی


اشارہ کردو تو نظم جہاں سنور جائے
نظر کرو تو بدل دو مُقدَّرات علی


حُدودِ بزم جہاں ترے سامنے کوتاہ
وسیع تر، تری چشم مُشاہِدات علی


ترے بغیر ترقی کا ہرسفر ناقص
کہ تیرا عشق ہے ُمہرِکمالیات علی

ترا وجود ہے دروازۂ علوم رسول
بسا ہے تجھ میں جہانِ مُکاشفات علی


بنے وہ ذرۂ خاکی حریفِ ماہ و نجوم
پڑی  ہے جن پہ تری چشم التفات علی


نہ ہو سکے گی کما حقہُ تری توصیف
خمیدہ سر ہیں زبان و قلم، دوات علی


نہ کیوں رکھیں صدَفِ دل میں یہ گہر مومن
ہے تجھ سے عشق و وفا باعث نجات علی


بھنور سے کشتیٔ اسلام پار کر دیجے
کہ اہل حق کے ہوں بہتر معاملات علی


ملی ہے دادِ سخن اس لئے فریدی کو
زبان و خامہ و دل پر ہے تیری بات علی

                =======
 از -فریدی صدیقی مصباحی بارہ بنکوی ، مسقط عمان